Биография

Гөлнара (Ишмәтова) Байназарова 2004 елда Яр Чаллы шәһәре музыка мәктәбен тәмамлый. Биредә ун ел укыгач, 2004 елда ул Казан дәүләт консерваториясенә укырга керә, башта ике ел әзерлек курслары үткәч, консерваториянең төп курсларына күчеп, биш ел дәвамында РСФСРның халык артисткасы, профессор Галина Трофимовна Ластовка классында вокал буенча белем ала, 2012 елда тәмамлый.

Булачак җырчы бу елларда төрле конкурсларда катнашып лауреат исемнәренә лаек була, Йошкар-Ола шәһәрендә узган «Белая акация», Түбән Камада Салих Сәйдәшев конкурслары – шундыйлардан. Соңгы елларда Әлфия Авзалова исемендәге, Венера Ганеева исемендәге халыкара конкурсларда катнашып лауреат исемнәрен яулый.

Гөлнара Байназарова 2013 елда Габдулла Тукай исемендәге Татар дәүләт филармониясенең әдәби-музыкаль лекторий бүлегендә эшли башлый һәм бүгенге көнгә кадәр иҗади эшчәнлеген дәвам итә. Якты аһәңле колоратур-сопрано тавышка ия җырчы татар халык җырларын да, татар, рус һәм чит ил композиторларының ария, романслар кебек катлаулы әсәрләрен дә, халык җырларын да бердәй зур осталык белән башкара. Шулай ук ул 2017 елдан бирле үткәрелеп килүче күренекле композитор Сара Садыйковага багышланган концертларда еш чыгыш ясый. К.Тинчурин театрында барган Җ.Фәйзинең «Башмагым» спектаклендә зур уңыш белән Сәрвәр ролен тамашачыга җиткерә. Биредә «Музыкаль җәүһәрләр» концертларында катнаша, К.Тинчурин театры оркестры дирижеры, Татарстанның атказанган сәнгать эшлеклесе Ильяс Камал җитәкчелегендәге оркестрга кушылып җырлый.

Гөлнара Хәмит кызы Байназарова шулай ук Казан шәһәре Совет районындагы 6 нчы номерлы сәнгать мәктәбендә унбиш ел вокал укытучысы, «Апуш» балалар театр студиясендә вокал остазы булып эшли, балалар вокал ансамблен җитәкли.